de hermenie van Postert

laatst aangepast: 15-10-2009 | 14:25

DE HERMENIE VAN POSTERT
een gedicht door Toos Visschers-Schoenmakers

kom, kom hie
dao kump de hermenie

sjtaats d'r vuur
löp 't besjtuur
mit Verschuure inne pas
achteraan Graad van Ietsje mit de bas

en Pierre van Meijers groot en gries
bleus ins hel, bleus ins lies
pront wie 't heurt
waerd door nieks en nemes gesjteurd.

Pierre van Pernot en Sjang vanne Meule
Baer van Bree en Sjang van Vonck
de ganse hermenie trik oet, 't is brônk

wierook en kerkgezangk
vermingk zich mit koperklank
aan ilke deur is sjoon gesierd
de brônk werd good gevierd

de zon in de insjtrumente vonk
biej Sjaak van Putsedriekes oppe Donk
sjeit de baog al gereid
en Truuke in 't kapelke te wachte sjteit

't Tantum Ergo en de zaege
ze kinne weer d'r taege
noe nao Casj nao de zaal
want dorsj is t'r ummer waal

Inne witte sjolk sjteit dao tante Leen
't duit häör good, det kinse zeen

Kom, kom hie
biej Casj dao sjteit de hermenie